Mheshimiwa Esther N. Matiko Aanza Ziara Tarime Mjini kwa Kishindo, Aahidi Kutatua Kero za Wananchi

 Mbunge wa Tarime Mjini, Esther N. Matiko, ameanza rasmi ziara yake jimboni kwa kishindo kwa kutembelea Kata ya Ketare, ambapo amekutana na wananchi, kusikiliza changamoto zao na kuahidi kuzifanyia kazi kwa haraka.

Asikiliza Kero za Wananchi Ketare

Katika mkutano uliofanyika Ketare, wananchi walipata nafasi ya kuwasilisha kero mbalimbali zinazowakabili, ikiwemo changamoto za miundombinu ya barabara, huduma za maji, na masuala ya maendeleo ya kijamii. Mbunge huyo alisisitiza kuwa lengo la ziara yake ni kusikiliza sauti za wananchi moja kwa moja ili kupata uhalisia wa changamoto zilizopo na kuzitafutia ufumbuzi wa kudumu.

Alieleza kuwa ofisi yake itaendelea kushirikiana na viongozi wa serikali za mitaa na mamlaka husika kuhakikisha kila hoja inayowasilishwa inapewa uzito unaostahili.

Serikali Yatenga Fedha kwajili ya Nyamwaga Road

Akizungumzia kwa kina kero ya barabara ya Nyamwaga Road, Mbunge huyo alisema kuwa tayari Serikali imetenga kiasi cha fedha kwa ajili ya ujenzi na uboreshaji wa barabara hiyo muhimu.

Alibainisha kuwa barabara hiyo ni kiungo muhimu cha shughuli za kiuchumi na kijamii ndani ya Tarime Mjini, hivyo kukamilika kwake kutarahisisha usafiri, kuongeza biashara na kuboresha maisha ya wananchi.

“Serikali tayari imetenga Tsh bilioni 8 kwa ajili ya Nyamwaga Road. Hivi karibuni changamoto hii itaenda kuisha na wananchi wataona matokeo,” alisema.

Kuimarisha Mawasiliano na Wananchi

Ziara hiyo ni sehemu ya mkakati wa kuimarisha mawasiliano kati ya mbunge na wananchi wake, pamoja na kuhakikisha miradi ya maendeleo inatekelezwa kwa ufanisi. Wananchi wa Ketare walionesha matumaini makubwa baada ya kupata majibu ya moja kwa moja kuhusu changamoto zao.

Ziara ya Mbunge huyo inatarajiwa kuendelea katika kata nyingine za Tarime Mjini kwa lengo la kusikiliza na kutatua changamoto zinazowakabili wananchi katika maeneo mbalimbali ya jimbo hilo.